05 février 2010
Soirée Théâtre à Ailly le Haut Clocher
Chl'étchipe éd téyatreus dé
ll'Anmicale dé zz'inciéns élèfes d'Ailly l'Heut clotcher
all'est dsur scin.ne
l'vindérdi 12 éd févérier à 20H30
l'sanmdi 13 éd févérier à 20H30
l'diminche 14 éd févérier à 15H00
Progranme
Les deux miss
pièche in français
C'est pas permis
pièche in français pi in picard
Ouvrache eud premier mai
pièche in patois lillois
einne lettre impoésonnée
comédie in picard
ézz'intérmèdes aveuc
chl'accordéion pi des canchons
cha s'passe à l'salle éd chés Fêtes d'Ailly
chl'intrée ch'est 5 €
o put értnir és plache à
mon Couronnel
tél : 03 22 28 00 01
29 janvier 2010
ch'cot
ch'Flipe Boulfro, coére dit chl'Hernu... à coeuse qu'o ll'intind dvant dé l'vir... i cante dsur scin.ne "a nou moèson o z'o tué un pourchieu"... normau, il o passié sn'éfinche dins l'boutique éd sin père d'où qu'o vindoèt du paté...
à mzure, i prind dz'airs dé slaves por canter...
"éch cot i s'queuffe
à ch'tchoin dé ch'fu
si s'queuffe ch'est qu'il o fro
éch cot i s'queuffe"
à nou moèson, ch'cot, dvant d'sortir dins ch'gardin, il érbéye la météo à ch'posse... conme cho, i sait si qu'i put sortir ou bien si qu'i doét s'métte à ch'tchoin dé ch'fu por justémint s'queuffer...
quoé qu'cha nn'est qu'des bêtes !
allez, à ch'preuchan coeup...
pi coére tous nous félichitations à ch'Flipe por és médalle d'érgint dins ch'concours éd chés pérson.nalités dins l'Oise.
18 janvier 2010
sérée picardisante
Soin à vous...
ch'est Sanmdi l'23 dé ch'moés djinvier...
qu'chés bros cassés éd Dgise dins zz'abes
is vous attin.n'nt...
à l'salle éd chés fêtes éd Boves...
à 20H30...
por éne sérée d'Téyate éd brun...
os puvez vnir aveuc vous coepans !
réservations à ch'Mariel
03 22 09 23 20
chmarield@yahoo.fr
03 janvier 2010
coucou pi réclame
Dvant toute... éne boin.ne énnée à tértous !...
Titine él routchine all'o foèt cho qu'i folloèt por qu'a s'passe bien !
Aveuc éch moés d'jinvier,
ch'est éne sérée tout neue qua s'prépare...
alorse, né l'mantchez point !
Progranme dé l’sérée
… conme qui diroèt « chés fux d’l’anmour ! »
Ch’brafe Alfred
…conme qui diroèt « cho qu’ch’est qu’l’anmitié ! »
Erpos d’an.niversaire
…conme qui diroèt
« cmint minger in fanmile ! »
À zz’urnes chitoéyén.nes
…conme qui diroèt
« pan.nique à burieu d’vote! »
Pi à mzure des canchons…
os puvez édjo réserver...
ch'est à Boves l'23 d'jinvier 2010
à 20H30
à l'salle éd fêtes
pou n'in savoér éd pusse : 03 22 09 23 20
02 décembre 2009
éch pan
Os vous raminteuvez ?...
dins ch'moés d'avri 2009, j'vous avoès inmné à Bayonvillers, ch'Poèyis d'chés Pêtcheus d'leune...
mon Inés, él biélle tchote bolindgère...
(dins zz'archives, avri 2009, mon chés pêtcheus d'leune)
bin inhui, os rtornons là-bos por vir tcheuire éch pan.
por vir miux chés photos, os clitchez édsur...
cho, ch'est Inès...
cho, ch'est ch'four... il est dins l'cour... ch'est un four à fu d'bos !
cho, ch'est l'dgeule dé ch'four... infan l'porte...
por foère du fu, i feut dz'échpées aveuc du bos sè prins dins zz'haillures à msure...
éne tchote feulle éd papier jornau pi tout cho a prind in disse ésgondes...
jé n'raconte point d'tarabistoulle... i gno mie d'feumée sins fu !
du boin bos sè, i gno rien d'miux por queuffer... i n'minque pus qué ch'cot qui dvroèt s'queuffer à ch'tchoin dé ch'fu !
in darin coeup d'oel... ch'fu i s'meurt... i gno pus qu'des braises... cha vo t'ête éch monmint...
ch'monmint d'inlver chés chindes por foère plache à ch'pan...
pi d'passier un coeup d'ramon por équ'toute i fuche preupe... dins l'minme temps, l'caleur a s'in vo un tchot mollé...
pasqu'un four éd trop coeud, ch'n'est dgère boin por él tcheuisson... alorse, o jette éne poégnie d'frain.ne én'ndins : si qué l'frain.ne a rouchit sins breuler, ch'est qu'ch'est boin !
ah ouès !... i n'feut point t'oblier él l'ieu por métte un mollé d'heumidité lo-ddins : éne castrole rimplie d'ieu a seuffiro !
durant ch'temps-lo, ch'pan il o lvé minme bien gonflé... i gno pus quà ll'apporter dsur chés trétieux...
os n'treuvez point qué l'bolindgère all'o des biélles miches !... (chtolle-lo, j'ai point pu mé nn'impêtcher...)
prinde éch pan sins qu'il értchèche... l'caressier tout duchmint pi aveuc éch rasoér li foère éd z'intailleures por qu'i vive pi qu'i craque...
aveuc él pelle à long minche, chatchun treuvro s'plache... minme chés pans aux rogins...
lo, dins ch'four, l'magie a s'in vo s'métte in route... ch'pan i s'in vo gonfler... ch'pan i s'in vo s'colorer...
in tchot mollé pus tard, vlo ch'pan qui l'est tcheuit, qui sint boin, qui foèt saliver !
i gno pus qu'à l'sortir, pi l'foère tchèr dins l'man.ne.... sins oblier dé l'timbouriner à ch'tchul por vir si qu'i réson.ne... preufe qu'il est bien tcheuit !
alorse, él bolindgère all'éro des bieux étchus... mais n'insoèyez point d'li voler... os éroètes des soucis aveuc sin tchien Stylo qui veille édsur elle !
Inès a foèt sin pan au levain aveuc és frain.ne à elle... qu'a vient d'sin blé à elle... qui pousse su ses terres à elle... des terres bio !
ch'est à Bayonvillers, 4 rue d'Marcelcave...
os puvez acater sin pan l'vindérdi au matin, à ch'martché d'Dury, dins chl'IME d'la Sonme, in fache d'Auchan d'où qu'os n'treuvarez point du pan dé l'minme qualité.
a vind sin pan eussi à s'cinse... tél : 06 80 94 08 42
a put s'foère sur écminde...
pi tous les jeudis éd 17h30 à 19h...
in minme temps qu'des lédjeumes tchultivés naturelmint...
n'mantchez point d'aller i vir...
11 novembre 2009
un diminche à l'Cinse éd Paillart
Ch'étoèt par un bieu diminche...
ch'diminche 11 dé ch'moés d'octobe por miux dire...
un diminche point conme un eute ...
vu qu'os étoèmes à Paillart...
un titchot poèyis jusse à l'frontière intér la Somme pi l'Oise...
Ch'étoèt mon Delphine Cnudde, à l'cinse dé ch'Val éd Noye... dins l'rue dé ch'Pont à beudets.
Ch'est éne cinse qu'o aleufe des bétals à z'ailes : des pordrin.nes, des glain.ne, des côs... mais seurtoute des canérds...
des canérds qui sont lo, por nous dgifes...
Pi tous chés dguelus dé ch'tchoin bin éch jor lo, is l'étoètes évnus por fêtier chés 10 énnées dé production d'vian.ne, éd pâtés, éd confits pi d'foée gros.
Por cho, Delphine all'avoèt ameuté un mont d'gins qui l'avoèt'nt monté leus éstandes dins l'cour... i gn'in avoèt por tous les goûts...
Zès vlo lo in nsous...
os purrez aller zès vir por vous acatries d'chés réveillons pi minme por tous les jors à msure !...
Ch'brasseu
Benoît Van belle éd Villers Tournelle dins la Somme.
os puvez aller l'vir su sin site :
Chl'alveu d'calémichons...
Romain Godefroy éd Sentelie dins la Somme.
os puvez aller l'vir su sin site :
http://www.saveursdescargots.fr
Ch'fromager dé ch'poèyis picard...
Ch'Gaëc dé l'Capelle Saint Jean à Grémévillers dins l'Oise.
os puvez aller zès vir su leu site :
Chl'hortillon
Bernard Parmentier
dins ch'quartier d'La Neuville
29 rue de l'Agrappin à Amiens dins la Somme
03 22 41 59 13
imèle : fermedeshortillonnages@orange.fr
Ch'bertcher d'ès
aveuc tous chés prodeuits d'chés mouques à miè...
Christian Payen
à Bonneuil-les-Eaux dins l'Oise... 11 rue d'en bas
03 44 80 60 64
Ch'borlindger
Alain Brigaud
Cinse "Entre Deux Prés"
3 rue Erondelle à Demuin dins la Somme
03 22 42 77 59
Ch'fabritchant d'pineau...
Dominique Juttaud
1 chemin Durand
à Montpellier de Médillan (17260) dins la Charente Maritime.
05 46 91 66 01
Chl'alveu d'coéchons...
Jean-Michel Poppe
dé l'Ferme des Trois Châtaigniers
13 rue Saint Jacques à Villers Tournelle dins la Somme.
03 22 78 11 25 ou 06 26 34 48 68
imèle : jean-michel.poppe@laposte.net
Ch'vititchulteu d'Anjou...
Fanmile Robin-Bretault à ch'Catieu du Fresne in Anjou.
os puvez aller zès vir su leu site :
http://www.chateaudufresneanjou.com
Por s'anmuser un mollé i gn'avoèt...
chés beudets
zz'éscaladeus d'abes
Chés jux picards
ju d'dgise... tabe d'assiette... tabe à glincher... javlot dsur chibe... garnoulle...
ch'est aveuc Guise et Traditions
à Boves dins l'Somme, à ch'L°1 rue du Commandant Jan
03 22 09 23 20
chés coveboéys dinseus
pi biéseur... l'cinse dé ch'Val éd Noye
tout cho qui torne à l'intor dé ch'canérd
terrines, foie gras, confits pi tout ch'reste !
volaille pi éspéchialités régionales
aveuc él Fanmille Cnudde
2 rue du Pont des ânes à Paillart dins l'Oise
03 44 07 11 30
25 octobre 2009
wallonie : volume 2
sanmdi 26 éd septinme...
i fsoèt un solé du diape à Gougnies fin près d'Charleroi...
l'fanfare éd Chouzé sur Loire a nous offroèt éne aubade por lancher chés festivités.
por miux vir chés photos, i feut clitcher édsur.
Ditch pi Pol is suit'nt té cho d'près...
Titine él routchine pi l'Baron.ne dé ch'catieu d'ieu eussi... pérel por ch'René, ch'Maristér, Pupuche pi Dominique jusse drière...
ch'Michel i n'perd point éne note...
pi ch'est ch'duel : grosse tchaisse conte timbour...
Ditch pi ch'Michel is l'ércach'nt él quadriphonie...
pi d'un coeup, éch messie i déchind dé ch'ciè... chl'offiche i put cmincher !
Seuvés, i nn'éro por tértous...
à forche éd souffler, o z'est réssuyé...
dvant d'passier à tabe, o s'érgroupe por boére un darin coeup... ichi : ch'Michel, Ditch, Mimimouse, l'Baron.ne, Titine, Pupuche, ch'Maristér pi Monmérirené...
ch'volume 3 à ch'preuchan coeup !
08 octobre 2009
wallonie : volume1
Quand qu'o arrife à Gougnies, tchot poèyis d'Wallonie, à coeté d'Charleroi, o z'est atcheuillé par éne imbachadriche...
"él bière"
qu'i feut boére aveuc modération...
Ch'est cho qu'os avons foèt, nous z'eutes chés dgiseus (ch'Baveu, Tonton, ch'Maristér) pi chés dgiseuses (Titine, l'Baron.ne, Pupuche), él soér minme éd nou arrivée...
(por miux vir, os clitchez su chés photos)
Rapidmint, tindisse qué l'fanfare éd Chouzé d'Touraine, a jue des morcieux intrinants...
L'timpérature a monte pi cha cminche à érmuer...
Gn'in n'o qui voétnt té cho d'un drôle d'oel...
Nous z'eutes os rédvnons sarieux...
Seurtoute quand qué ch'Michel pi ch'Didier, chés Boss dé l'fête is l'arriv'nt...
Mais o zès méttons ahite dins nou poque quand qu'o leu offe pi dins l'minme temps à nous hôtes, des bieux pan.niers gourmands aveuc ézz'éspéchialités d'nou boin Poèyis d'Sonme...
ch'volume 2 il est à vnir...
25 septembre 2009
Biévnue mon chés Wallons
Cho ch'est mon ch'Pérsidint d'chés Dgiseus d'Boves... quand qu'chés Wallons qui jut'nt à l'britche(un ju qui l'érsan.ne à l'dgise) is sont évnus foère un tchot coucou dins ch'moés d'mars 2008.
Dins ch'viquène tchi vient, ch'est l'fête dins leu poèyis d'Gougnies... pi ch'coeup-chi, ch'est nous z'eutes chés Picards qu'os allons là-bos por prisinter chés jux picards pi d'traditions...
Os purrez seuire tout cho dsur ch'blog quand qu'os srons révnus pi qu'os érons distillé "l'Gougnies", él bière dé ch'poèyis...
18 septembre 2009
in passant par Sant wary 2)
Vlo un moés d'passié pi dé ch'boin temps, nous vlo pratiqu'mint à chés courts jours... hureusmint qui gno coère chés photos por nous don.ner du solé...
Dins l'moés d'eût, os avoèmes foèt éne tchote pronmnate à sant Wary (vir él page d'édvant) pi in seuiant chés tchais, i gn'avoèt un tchot mollé d'monde... ch'étoèt ch'martché à vrèpe... pi vlo ti point qué j'tchè dsur...
Mais ch'est un Lafleur éd bos qui l'est aheutché lors à l'voéture !
Ouès, ch'est bien li, jé l'arcon.noès à sin ziu filouteu...
Pi li, ch'est ch'Laurent !...
Ouès, ch'est bien li, jé l'arcon.noès à ses cavieux... pi llé-vlo don écriveu publique achteure !...
Oh bin lo... vlo ch'Flipe Boulfro aveuc ???... is sé sont don.nés rindez-vous !...
Ouès, ch'est bien li... o l'arcon.noèt à ses attributs !...
Bin disez-mé... dé ch'coeté lo, o sé nn'in foèt dgère !
Pi lo, vlo ch'Tétard... un tchot mollé flou mais ch'est li, jé l'arcon.noès à ses leunettes !
Ch'est bien li, il coére in route à dématcher pi dire des bêtisses !
Pi dé ch'coeté-lo, a n's'arringe point !
Nom des zous... quoéqu'cha nn'est qué l'taque rouge, lo dins chés jux d'assiette ?
Ah ! ch'est chl'éslanmeu qui l'éslanme in picard !...
Minme qué ch'Lafleur il arbèye cho putôt ébeubi pi qué ch'Laurent i sé nn'in dégratte és caouète !
Durant ch'temps-lo, ch'Flipe il attind sin tour !
Ch'Lafleur i n'est point in resse... il inte in scin.ne !
Pi vlo qui s'met à dinser l'franche cancan !
Pi li, i salue sn'euditoére !
Cha i est... chl'Hernu il o prins s'gratte, il o sin capieu dsur és tiête... soin à vous érelles, i s'in vo canter !
Pi érien né ll'arrêtro !
sié... éch soér qui tché dins l'minme temps qué l'frèqu'tinme !
Allez... dvant d's'in rtorner, éne tchote photo aveuc éch Baveu !
Pi chés fenmes as s'i mett'nt... il est temps d'aller s'joutcher !