passage à France Bleu Picardie

Dins ch’moés d’avri 2008, ch’est l’sison d’chés Portes overtes dins tout ch'départ'mint… o dit coére " Bienvenue à la ferme "…

Ch’est por cho qu’chés 19 pi 20 d’avri, os purrez vous rinde à Vignacourt… ch’poèyis d’chés Tchots Lapans blancs, d’chés Contérbindiers, d’chés Marchands d’madgettes…

Carole ROUVILLAIN, l’fille d’Francine pi ch’Marceau, a fête chés 10 ans d’HORTIPASSION… chés fleurs, ch’est éne passion por elle, alorse, all’o foèt ses serres dins l’cinse éd ses pérints qui sont achteure in értraite.

All’o d’mindé à ch’Mariel si qu’i n’puvoèt point évnir baver in tchot mollé in picard ch’diminche 20…

Alors, il o don.né s’n accord pi i f’ro ch’déplach’mint aveuc Titine él routchine, sin blanc-bon.net…

Is prisint’ront quate liries in picard… d’z’histoéres qua sont des tchotes scin.nes d’la vie corante, putôt dirigées su chés tchotes gins d’chés campangnes in fache dé ch’progrès dins zz’énnées 50-60…

" ch’est pus conme dins l’temps "… éne histoére éd Mariel ch’Baveu d’Boves

" L’salle ed ban "… éne histoére éd Mireille Petit-Fraissaint

" El médalle "… éne histoére éd Georges Courcol

" A ch’l’aginche éd voéyage "… éne histoére éd Tchot Jacques Varlet

Jeudi 17 d’avri, Carole pi ch’Mariel is sé sont értreuvés à France Bleu Picardie dins l’l’émichion d’Jean-Pascal Coste : ‘’La marmite’’ pou parler d’cho qui s’in vo s’passier dins chés deux jors dé l’Portes ouvertes…

à chés manettes, i gn'avoèt éne bielle tchote ingénieusse du son...

Ch’Mariel il est nu parler d’chés Dgiseus, dé l’Gazette, d’chés jux picards…

Carole all’o foèt décovrir sin watieu à l’lavinde pi pétales éd géranionmes…

Cha s’o su ahite dins chés burieux pasque tous chés éscrétaires, ingénieus dé ch’son, prisintateus, ramon.neuses... pi jé n’n’oblie, is sont déchindus por avoér leu bout d’morcieu d’watieu.

pi tout ch’bieu monde-lo, qu’il est putôt à s’dgife, il o matché ch’fanmeux watieu à n’pus n’n’in laissier éne miette…

Un boin monmint qu’os puvez értreuvoére à l’l’adrèche lo-in nsous si qu’os vulez acouter l’l’émichion.

http://www.radiofrance.fr/chaines/france-bleu/?nr=f5b4498be77e4fe4d2dc2b841ef49baa&aa3233101eb0971c0edfdc7d733e9812_container_id=787&aa3233101eb0971c0edfdc7d733e9812_container_mode=instances&aa3233101eb0971c0edfdc7d733e9812_article_id=235398

Alorse...

Rindez-vous tértous à Vignacourt chés 19 pi 20 d’avri

mon Carole Rouvillain à l’Ferme Hortipassion.

Vlo l'l'érchette à Carole

Watieu à l’fleur éd lavinde pi à l’rose

Pou ch’watieu, i feut :

- chinq us

- 250g éd chuque

- 200g éd frain.ne

- l’mitan d’un patchet d’élvure

- 125g éd burre, 3 tcheuillères à cafè d’fleur éd lavinde

Pou ch’nappage, i feut :

- 150g éd chuque-glache

- 2 tcheuillères à sope éd chirop d’rose

Cho qu'i feut foère :

- Foère fonde éch burre aveuc él lavinde.

- Batte ézz’us aveuc éch chuque pou qu’cha blantchisse.

- Ajoutier l’frain.ne pi l’élvure.

- Métte éch burre fondu aveuc él lavinde.

- Versier dins un moule burré in couron.ne.

- Métte dins ch’for à 180° durant 45 minutes.

- Mélinger éch chuque-glache aveuc éch chirop d’rose pi versier dsur éch watieu après qu’i fuche érfroédit.

- Os puvez éjter des pétales éd roses pér édsur.

Comments

[mickey]

ben j'sais pas si l'recette elle est bonne mais je vais p'tete essayer surtout que l'on m'a fait cadeau d'une bouteille de "chuche mourette" qui vient de ch'nord !

[bacouet annie]

Merci pou ch'l'arcette, cha a l'air fameux! l'resse aussi
annie