rinche dins ch'Ponthiu
à chés Dgiseus, os ainmons bien foère des tchots tors dins l'campangne... ch'est conme cho qu'os nous sonmes értreuvés, un bieu jor, mon Mimimouse pi Monmariréné à Fanm'chon, tout prés d'Ailly l'Heut Clotcher.
assis :
ch'maristér éd sain'n'ville, Mariel éch Baveu d'Boves, Tchot Lucas
édbout, d'gueuche à droéte :
Titine él Routchine, Tchote Gadoux, tonton Patrick, l'Baron'ne dé ch'Catieu d'ieu, Pierrette, Martintin, Mimi, Monmariréné, bélisa, Mimimouse, Elodimétoute.
chés tchiens : Toy pi Aston
ch'meulan Vaillant-Tellier
Il est plaché su ch’platieu fin prés d’Hémimont, su ch’térritoére éd Yaucourt-Bussus mais il appértient à l’Conmeune d’Bussus-Bussuel.
Ech soubass’mint il est in grès pi in silex, chés murs is sont in pierres pi ch’quaînache il est in briques.
In 1900, il avoèt d’jo pardu ses ailes mais il avoèt coére sin toét.
O croét savoér qu’il o pâti pa d’inchindies dins zz’énnées 1635-1640 quand qu’i i o ieu chés batalles probabe dé l’Dgerre éd Trinte Ans.
In 1994, o z’o c’minché à réparer pi o z’o r’martché qu’chés treus is l’avoèt’nt té r’bouchés aveuc des briques.
Ch’est un meulan-tour du pérel-minme qué ch’ti d’Eaucourt, à coeté d’Adville.
Durant zz’énnées 2006-2007, après chés traveux d’érmisse in état, i d’vroèt r’treuver sin toét pi zz’émneus’ries.
Quand qu'os nous lanchons dins éne rinche, nous ziux is r'béy'nt tout pértoute pi cho qu'os décachons, ch'est éne élchon d'coses pou l'bon'nheur éd chés tchots conme chés grands... lo, des chimpignons d'pâteure qui f'roèt'nt bien dins éne poéyelle aveuc éd z'us.
L'quart'rie
os avons alorse érprins nou c'min pi trécoeupé d'à travers chés camps... tout d'un coeup, a nous o apparu... conme qui diroèt un OVNI étimpi in plein mitan d'chés camps... éne quart'rie... éne tass'rie... battue pa ch'vint, tchuite pa ch'solé... os nous avons approchés...
pi coére un tchot mollé... à prémière vue, point d'tchots boinshonmes verts, ni minme gannes...
Chétlos qu'o voét dsu l'l'imache, ch'est zz'éclaireus qui déblay'nt ch'l'écmin... point d'maouès sing... ch'l'écmin il est libe !...
Rindez-vous compte, a tient bien tout cho, pi os savez, i put tchère éne drache, os n's'rons point mouillés... un pérel toét por foère quoé ?...
I i o point t'à dire... cha n'n'in tchitte pusse d'éne su l'tchul... quoé qu'i s'passe dins chés caouètes à vir des pérelles coses... lo dins ch'désert du Ponthiu, à mille milles éd chés terres habitées !...
I i o point à dire, ch'est du bieu !... i i o tout ch'qu'i feut pou don'ner à matcher à chés vaques... pi ch'toére i put tirer édsur, ch'est du solide.
I gn'o point à dire, chés fenmes as sont tchurieusses conme des pets... il o follu qu'as pouss'nt él'porte... pi ch'Lucas i n'o point d'mindé sin resse por rintrer ch'prémier.
Nan mais, os voéyez cho vous z'eutes... cha m'éton'n'roèt qu'chés moèsons d'achteure as l'euch'nt des querpintes conme éch'tolle !... cré vingt diux... chés vaques as d'voèt'nt té don'ner pou leu foère éne pérelle étabe !
Coeup d'chifflet !
Monmariréné, nou dgide du jor, i r'bot ses treupes pi i foèt l'point... i fut t'ête à l'heuteur avec un baroudeu conme li !
in reute pour Bussus-Bussuel
Os marchons, os marchons... pi d'un coeup, os rincontrons ch'camp d'soéle dé ch'villache... mi j'sus t'un matché d'chimétères... point pou m'foère peur... nan, pou cho qu'i i o n'dins.
Chés tombes : éj cache tours él pus vieuse pi lo, j'armonte éch temps in pinsant à cho qu'chés gins qui sont lo in'nsous is l'ont con'nu, cho qu'is l'ont foèt.... jé zz'ainme bien chés gins-lo !
Vlo qué ch'chimétère il o té r'dréché conme a s'foèt achteure dins tous chés villaches. Edvant, étoèt bieu un chimétère, aveuc chés tombes dins tous les sins, ... achteure o s'croèroèt dins chés rues d'Nouvioque... i feut qu'a fuche droét, aveuc des c'mins qui s'trécoeup'nt à ingue droét pi aveuc chés fleurs in plastique... infan !
Qu'o r'métte tout cho d'aplomb... bon ! mais tout d'minme, os tapons nous pieds su d'zzous qui l'ont té obié lo... pi ch't'honme ou bien l'fenme à tchèche équ'cha manque... c'mint qu'is vont foère à ch'jeuj'mint darnier.
Bon toute i n'o point té pardu pasqu'avec ch'bout d'morcieu d'fémeur pi l'vértèbe qui trinoèt'nt, bin Bélisa, qu'sin métier ch'est infrimière éd bloc, a nous o foèt un cours d'anatomie... pi os avons r'prins nou c'min.
L'Capelle d'Hémimont
Fil à m'sure qu'os rév'nons su l'reute éd Yaucourt, o l'voét qua monte él bout d'sin nez.
Monmariréné i nous o rasan'nés à l'intor éd li pi lo i nous l'lo prisintée...
Minme chés tchiens is l'acoutoèt'nt él l'histoére dé l'tchote cahutte...
L’Capelle d’Hémimont
" O n’put point t’i métte des portes. "
All’est bâtie à l’plache d’un fanum, tchot tempe gallo-ronmain. A s’treuve à 1500m au sud éd Bussus in allant vers Ailly l’Heut Clotcher (Hamingus Mons).
AIMIMONT, ou EMIMONT, ou HEMIMONT, ch’est un fief dé l’Abbaye d’Sant Riquier, d’jo con’nu in 831. Ch’est l’éne éd chés pus grandes d’Urope.
L’capelle all’est bâtie in 1480, in pierres éd taille.
A partir éd 1655, l’Confrérie dé ch’Rosaire a met in reute des pél’rinaches : à chés Rameux, à Pâques pi à Noël, ch’pél’rinache éd chés mat’lots d’Adville.
Ch’l’ermitache l’o té t’nu par un érligieux dusqu’in 1870.
Dusqu’in 1960, éne prochéchion mariale a t’noèt un érposoér l’15 d’eût.
Durant l’Grande Dgerre, zz’Ingliches is s’i métt’nt au rado.
In 1943, chés Boches is l’démolich’nt à coeups d’canons pasqu’a servoèt d’érfuche à chés partisans.
Un mollé dé ch’mobilier l’o té seuvé par zz’habitants d’Bussus. Chés traveux is vont pérmétte d’érmétte toute édbout.
L’Tradichion a vut qué l’porte dé l’capelle a fuche toudis overt. O déchindoèt n’dins par 3 ou 4 marches, éslon l’tradichion romane mais l’voûte all’étoèt gothique.
in 1994, un chintier d’inserchion i l’érsort éd l’obli in r’méttant in plache chés murs pi zz’ogifes.
In 2002, l’l’achuchon " Association Hémimont-Moulin " a trahalle dur por érdon’ner à l’capelle s’bieuté d’antan.
Chés traveux is d’vroèt’nt t’ête finis in 2006.
" Ti qu’tu passes, point d’buzin des foés qu’tu l’l’éyeufes… pasqu’a foèt des longués neuit qué l’capelle a sommelle ! "
L'fréqu'tinme all'o c'minché à déchinde pi a s'foère sintir dsu nou tchots corps ingordis, alorse os avons r'prins ch'l'écmin dé ch'l'értor...
Un r'pos bien mérité
Lo, zz'imaches as parl'nt tout seu... os nous sonmes értreuvés à l'intor dé l'tabe mon Mimimouse pi Minmariréné... os avons bu ch'l'apéritif moèson, mingé conme des dgeulus, bu conme des boés sins soé, minger dé l'tarte pi jé n'vous dis point toute...
Boin Noë à Tértous
Foésez honneur à chés pordrain'nes
/https%3A%2F%2Fstorage.canalblog.com%2F36%2F98%2F347993%2F49374813_o.jpg)
/https%3A%2F%2Fstorage.canalblog.com%2F97%2F19%2F347993%2F49122451_o.jpg)
/https%3A%2F%2Fstorage.canalblog.com%2F72%2F81%2F347993%2F48717014_o.jpg)
/https%3A%2F%2Fstorage.canalblog.com%2F83%2F68%2F347993%2F48118284_o.jpg)