L'visite éd chés Wallons
Conme dit dins l’darin.ne page, chés gins d’Gougnies – chés Wallons- is sont nus nous foère un tchot coucou l’sanmdi 8 éd mars.
Nous is puvoèt’nt nous arcon.noète vu qu’is nous avoèt’nt vu su ch’blog… nous, pou z’arcon.noète, is nous avoèt’nt dit qu’a n’éroèt point té diffichile vu qu’is l’avoèt’nt des tiêtes éd Belges…
Is n’ont point s’impêquer d’métte des cadieux dsur l’tabe : chés tichorques éd Gougnies, l’biére éd Gougnies, ch’seuchisson d’Gougnies, ch’formage éd Gougnies, chés congolais d’Gougnies… mais cho qu’i l’o foèt saliver coére pusse Titine él routchine, ch’est éch chucolat…
A l’heure qu’os sonmes inhui, i n’resse pus érien : Titine all’o tout matché… qué dgeuluse !
Vlo qu’chés beudets-lo, is nous prindoèt’nt pou des Chtis… feut dire qu’is l’avoèt’nt té vir " Bienvenue chez les Chtis "… pi qu’is pinsoèt’nt équ tous chés gins pér édsus d’la Seine, ch’étoèt des Chtis (cha foèt partie d’chés dégôts colatéraux dé ch’film)… mais is l’ont bien rigolé pi brai…
Alorse, is l’ont foèt con.noèchinche aveuc nou jornau " L’Gazette éd chés Dgiseus "… ch’qu’i l’o parmis d’s’édviser in picard pi in wallon… os avons comprins rondibilis qu’os étoèmes foèts por nous comprinde.
Pi is l’ont foèt con.noèchinche aveuc Lafleur pi Sandrine…
Pi seurtoute aveuc nou brichte à nous… él dgise pi s’bate… J’pinse qu’in 2008, l’prémière rinconte intérnachion.nale éd dgise-britche a s’in vo avoér liu… os sonmes in reute à négocier chés droéts aveuc chés tévisions du monde intier.
Ch’Maristér éd Sain.n’ville pi Pupuche és fenme pi ch’l’Abel leu nazu is sont arrivés por érsortir eussitôt pasqu’os voloèmes quand minme foère montrer Anmiens à nous cousans…
Arrivés dins ch’Chinte, os avons bien aniché ch’l’Abel dins s’carette…
Fan hureux qu’is l’étoèt’nt nous Wallons qu’Anmiens leu sohète él biév’nue…pi ch’étoèt parti !
D’abord ch’l’Hôtel éd ville qui l’o cangé d’locataire un tchot mollé pus tard…
Un tchot mollé pus loin, leu ziux l’ont té prins pa l’bieuté d’éne jon.ne fille fan rétuse, in reute à montrer ses charmes à tous chés passants à ch’bos dé s’n horloche : l’bielle Marie sins c’mise…
Après avoér déchindu l’rue Dusevel, leus ziux is n’in rév’noèt’nt té point : l’Cathédrale d’Anmiens… mais leu joée a s’o arrêtiée ahite in voéyant chés traveux ingagés dsur ch’coeté gueuche… is sont prêts à nir aveuc chés beuldozers pou nétier tout cho.
Is l’ont admiré ch’bieu quartier d’Sant Leu aveuc ses bros d’Sonme in disant qu’eux z’eutes is l’avoèt’nt eussi éne Venise aveuc Bruges… Sant Leu aveuc ses bistrots pi ses ristorants…
Pi passiés ch’tchoin dé l’rue, is l’ont ércon.nu nou héros Picard : Lafleur aveuc és’n éstatue plache Aristide Briand, sin Téyate rue Tchot Doère David, sins obier ch’l’atéier dé ch’bétal éd Facquier qui l’éstchulpte chés Cabotans édpus tant d’énnées.
Après cho, os sonmes passiés pa l’gare… un mollé déboussolés d’vir l’vérrière qu’is sont in reute à construire.
Cho foèt, l’neuit a c’minchoèt à tchère… alorse, os avons traversié Anmiens par ch’chinte piéton por érprinde nous carettes…
Un sapré r’pos nous attindoèt à Boves… pi conme ch’est Titine él routchine qua sé n’n’étoèt otchupé, os n’povoèmes équ’passier éne boin.ne sérée… ch’qu’os verrez dins l’preucahin.ne page.
@+
ch’Baveu d’Boves
/https%3A%2F%2Fstorage.canalblog.com%2F36%2F98%2F347993%2F49374813_o.jpg)
/https%3A%2F%2Fstorage.canalblog.com%2F97%2F19%2F347993%2F49122451_o.jpg)
/https%3A%2F%2Fstorage.canalblog.com%2F72%2F81%2F347993%2F48717014_o.jpg)
/https%3A%2F%2Fstorage.canalblog.com%2F83%2F68%2F347993%2F48118284_o.jpg)