ch'l'érpos aveuc chés Wallons

26 mars 2008

ch'l'érpos aveuc chés Wallons

Os vous raminteuvez, os avons ieu l'visite éd chés Gins d'Gougnies l'8 éd mars... après avoiér foèt con.noèchinche pi visitier Anmiens, os zz'avons invitiés à soper aveuc nous z'eutes...

Ene foés rintrés d’nou tor in ville d’Anmiens, os sonmes tértous értreuvés mon chés Dgiseus… os n’n’avons profitié por prisinter chés chédé d’chés groupes d’où qué ch’Ludo (ch’fiu dé l’moèson) i jue dé l’dgitare : Dgeuledvak, du hardrock festif… pi Askaris, du hardrock death… a n’rigole point dins chés deux.

Dins ch’salon, l’apéro nous attindoèt aveuc un mélinge foèt pa ch’Mariel pi d’z’amusettes foètes pa Titine…

I c’minchoèt à s’foère tard, abel i nous o foèt un tchot coucou d’vant d’s’in aller joutcher…

Os avons tchitté ch’salon pou l’salle à minger d’où qu’i gno ieu conme éne sorte éd benedicite…

Pou zz’intrées, ch’est du Pouilly feumé qui l’o té overt… minme que ch’Didier i n’n’in voloèt juste éne larme.

Du Pouilly, est boin aveuc éne assiette éd carpaccio d’cotchille Sant jacques qui trimpe dins ch’chitron vert, l’heuile d’olive pi un mollé d’feulles éd chicons à l’intor… mais i n’feut point obier l’fleur éd sel éd Guérande…

Ech choc éd chés goûts, des foès, cha don.ne des bielles photos…

Après cho, l’pintade aux choux-ponméterres-juillin.ne all’o prins plache dsur l’tabe arrosiée d’un tchot Morgon dé ch’Père Guillot…

Tértous is minjoèt’nt érligieus’mint mais chertans l’agglavoèt’nt éd soé pusse qué d’z’eutes…

A ch’formage, os avons sorti ch’Bordeaux…

Pi il éroèt dû i avoér éch treu normand mais cha o té un treu gougnacien : os avons goûtié ch’breuvache ambré qu’nous anmis is l’avoèt’nt rapporté dins leu coffe…

Un grand monmint… minme éch Mariel qui n’est dgère un buveu d’bière i s’o tchitté allé…

I gn’o point à dire, él bière cha rappreuche !

Allez, jé n’pux point résistier :

Mossieur pi Madanme Biérquéjpréfère l’ont un fiu… quoé qu’ch’est sin tchot nom ?…

Ch’est Michel… pasque Michel Biérquéjpréfère !… irrésistipe nan !

après cho...

A n’o point té aisié à Titine éd rapporter ch’dessert pasqu’all'étoèt bombardée d’tous les coetés…

Toute foèt moèson conme à l’habitute mon chés Dgiseus : un watieu au chucolat au mitan dé s’crinme un mollé inglaise… ch’Didier i n’osoèt point t’i toucher !

Por foère glincher, rien n’veut éne coupe éd van d’greuselles foèt moèson pou n’point canger…

L’heure all’avinchoèt… d’vant dé s’tchitter, i folloèt foère éne photo d’groupe por immortiliser nou anmitié… ch’l’attrintchillache l’o té monté…

Ch’Ben, ch’Didier, ch’Michel, ch’Mariel, ch’l’Estéphan.ne, Titine pi Elodie… tértous réeunis pou ch’meilleur, mais chertain’nmint pou ch’pire.

In Picardie, o n’sé tchitte point sins ch’tchot verre éd l’anmitié : ichi ch’marc éd chide qué ch’Flipe Boulfroy dé ch’groupe éd musique Achteure i nous avoèt apporté i gn’o tchèques temps d’cho.