du picard au collège à saint quentin
Du picard à ch’Collège Saint Jean éd Saint Quentin
Saint Quentin, os con.noèssez, ch’est l’Capitale éd l’Heute Picardie… là-bos, i gno ch’Collège Saint Jean qui foèt face à ch’Meusée Antoine Lécuyer…
Dins ch’Collège, o treuve éne poère éd volontaires dé ch’quartier qua l’ont mis in plache un " Coin lecture "… d’où qu’chés join.nes is peuv’nt évnir lire in toute trintchilité ou bien imprunter des lives pou lire à leus moèsons.
I gno minme des concours éd liries qui sont organ.nisés.
Probabe rapporte à ch’film éd Dany Boon, " Bienvenue chez les Chtis ", bin i s’foèt qu’chés join.nes is l’ainm’nt à parler dé ch’picard pi ch’est conme cho qu’à ch’tchoin lirie is l’ont pinsié à foère él 30 dé ch’moés d’mars un atéier dsur l’Tchulture picarde, él lingue édvant toute…
Deux classes éd chinquinme as l’ont don atcheuillé ch’Mariel, ch’baveu d’Boves qui l’est nu parler d’chés jux picards, d’chés chtis, pi dé lingue région.nale.
Cha o c’minché pa l’prisintachion dé l’l’Achuchon " Dgise dins zz’Abes " pi dé ch’ju d’dgise… un ju qui l’o bien intridgé chés nazus qui n’savoèt’nt té point pa tchel bout l’prinde… pi qui l'ont confondu un mollé aveuc él ville éd Guise pi sin Duc...
Pi cha o té un mollé d’giographie dé l’région à partir dé ch’poinme éd Maurice Garet : " Nou Sonme "…
Après cho, un tchot mollé d’vocabulaire l’o foèt du bien… d’abord, in voéyant cho qu’chés nazus is con.noèt’nt conme mots picards… ch’qui l’o parmis d’armétte chés pindeules à l’heure aveuc éch timi…
Liries d’mots, dictée, ézerchiches éd tradeuc.chion… tout cho cha o bien rét’nu leu attinchion… minme qu’is n’n’in rédmindoèt’nt…
Pou zès ricompinser, ch’Mariel i leu o racontié l’histoére dé ch’chuque améritchain éd Djustave Devraine, écriveu du Santerre…
Por savoér si qu’is l’avoèt’nt té bien acouté pi bien comprins, is l’ont ieu droét à éne interrogachion orale dsur ch’texte…
Conme éch temps i coroèt, is l’ont volu à toutes forches qu’os sortonches dins l’cor por infan taper dins l’dgise minme équ’ cha leu z’o reudmint plu…
A quand éne étchipe éd Dgiseus à Saint jean ?
J’armarchie chés gins dé ch’tchoin lirie pi chés professeus d’Français d’chés deux classes-lo d’avoér jué él ju minme qu’i gno tchèque cose qui m’dit qu’i gno point qu’chés nazus pi chés nazuses qui leu ont bien ameusés pi qui l’ont apprins des coses qu’is n’savoèt’nt té point…
Ch’Baveu d’Boves