des liries àch'Poèyis d'chés Tchots Lapins Blancs

Qué boin après-midi ,qué ch'ti-lo quand qu'os avons li d'z'histoéres à Robert mon onque à chés gins qui l'étoèt'nt évnus acater des fleurs mon Carole Rouvillain dé l'Cinse HORTIPASSION...

Is nous avoèt'nt préparé un éstudio in plein air aveuc éne tabe, des cayelles pi des micros pou qu'o nous intinche dins tous les tchoins...

L'Nathalie all'étoèt lo... ch'est l'grande soeur à Carole... ch'est elle qua s'o otchupée dé ch'son... pi soin à vous, ch'étoèt du costeud pasque ch'est sin métier : ingénieuse du son à l'Moèson dé l'Radio là-bos à Paris...

ch'n'est point chés boutons, chés fils pi chés micros à ch'chef qui li foèt'nt té peur...

Titine él Routchine pi ch'Baveu d'Boves is l'ont prins plache, coési zz'histoéres... d'zz'histoéres éd dins l'temps quand la vie all'avoèt coére du sins...

tout duch'mint, chés gins is sé sont appreuchés... chés gins is l'ont tours peur pi éne foés qu'i gn'o un tchot mollé d'monde, cha vo...

Minme Carole all'o v'nue acouter bien posée su ses gambes pi ses mans su ses hinches...

un monmint, un honme l'o nu s'assir à coeté d'nous z'eutes... ch'étoèt ch'Bernard Vast... un viu coepan qué j'n'avoès point vu édpus 1972... i nous o pus tchittés... pi, os savez qu'os avons r'foèt ch'monde...

os avons racontié l'histoére dé salle éd ban qu'papa i voloèt foère monter pi qu'manman a n'voloèt point...

pi ch'tolle dé l'médalle du trahal qu'un honme i croét qu'ch'est por li pi qu'vlo qu'ch'est pou sin blanc-bon.net...

cha l'l'o d'ailleurs tchitté parplesse pasqu'il étoèt fier d'avoér éne pérelle médalle...

pusse éch temps i passoèt, pusse chés gins is s'méttoèt'nt à l'intor... seur qu'i gn'avoèt pusse éd gins dins ch'l'éstudio qu'dins chés serres...

pi cha o té l'troésiinme histoére... l'l'histoére d'éne cinsière in étraite qua n'put point foère moins qué s'voésangne qua l'o té in Thaïlande... ch't'honme dé l'aginche éd voéyache i s'treue l'tchul à li décacher éne bielle destinachion... mais vlo qu'vu ch'prix, l'cinsière a déchide éd partir in... Baie d'Sonme... mi j'li don.ne bien rison !

éne tchote peuse... jusse éd quoé foère dé l'réclame pou ch'jornau dé l'achuchon "Dgise dins z'Abes"... l'Gazette éd chés Dgiseus qu'ch'est un jornau tout in picard, éd gueuche à droéte pi du heut dusqu'in bos...

os puvez r'martcher qu'Titine él Routchine a foèt sin sarieux... a n'vut point perde éch fil dé l'lirie, nan mais...

l'darin.ne histoére... ch'est coére éne histoére éd cinsiers dins zz'énnées chinquante... is sont in reute à boére éne tasse éd jus pi is s'raminteuv'nt leu vie minme qu'achteure, ch'n'est pus conme dins l'temps...

cha n'o point impêché chés join.nes éd foère du vélou pi d'posser chés boroettes...

infan, cha o té éne boin.ne jornée pou chés gins qui l'ont nus leu prom'ner à Vignacort...

mais eussi por Titine él Routchine pi ch'Mariel, éch Baveu d'Boves...

Comments

[mickey]

des vedettes, si , si vous êtes des vedettes, enfin des stars bientôt la télé, je n'en doute pas un seul instant. ou bien à la hall aux grains à Toulouse ?