ch'étoèt l'fête éd la nature
sanmdi 16 mai 17H
à Fignières - canton d'Montdidier
ch'étoèt ch'grand rassimblemint...
Nan, chés gins is n'sont point lo por chés conmeunions... is sort'nt dé l'église Sant Nicolas d'Fignières d'où qué ch'Bvaeu d'Boves is leu o parlé dé ll'église biéseur pi d'Sant Nicolas pi d'Sante Thérèse...
après cho, is sé sont rassimblés à ch'camp d'soéle d'où qué ch'Mariel is leu o racontié l'histoére éd Manme Wable, él pus vieuse pinsion.naire dé ch'camp d'soéle qua l'est née in 1750... un sapré voéyache !
lo, os sonmes arrivés à l'Montagne éd Fignières pi cho qu'os voéyez, ch'n'est point un dahu : ch'est camille dé ch'conservatoére qua l'o tout dit su chés plantes pi chés bétals qui viv'nt su ch'larris.
à msure, ch'Baveu i ranmnoèt és sciénche in disant éne tchote bêtisse conme par éximpe "cmint cacher l'bitarde ?"...
ch'est seur, i nn'o un qui n'acoutoèt point !
pi à l'tcheuleuleu, os avons déchindu ch'larris...
os avons rincontré dz'écnilles pi dz'orchidées pi dz'eutes trucs qu'Tonton i n'o point prins in photo... qué beudet chti-lo !
chés gins is l'ont ieu grand ploèsi à acouter Titine él Routchine pi ch'Baveu d'Boves leu racontier des drôles d'histoéres : dz'histoéres éd tchurés qui sé batt'nt aveuc éch diape, dz'histoéres éd soeurettes (fées) pi dz'histoéres éd bréilloères magiques...
mais i nn'o coère ieu un qui n'o point acouté... ch'preuchan coeup, os frons éne intérro écrite nan mais !
après l'apéro, chés seuchisses-frites-van rosé-tarte, os avons rbéyé zz'étoéles dins l'neuit mais conme étoèt nuageux, os zz'avons vues dsur un écran... pi os avons té foère él cache aux papillons aveuc éch Maurice, ch'gadrouilleu d'troube...
mais conme i fsoèt froéd pi qu'i drachoèt fin, chés papillons is n'étoèt'nt point légion !
mais cha o té éne boin.ne jornée tout d'min.me !
Ah ouès !...
sanmdi 6 dé ch'moés d'join 2009
os puvez vnir à l'fête dé ch'Marais dé l'Tcheu à Blangy-Tronville... i gnéro plein d'atéiers pi i gnéro eussi du picard dins ch'marais aveuc ch'Baveu d'Boves pi Titine él routchine...
ch'programme il est lo in'nsous édman...
à s'vir