Un viquéne à l'réserve
Conme est l'habitute à l'Réserve Sant Lade à Boves, à chés bieux jors... ch'est l'décoverte dé l'feune pi dé l'flore.
L'énnée-chi, zz'éstagiaires, Marion pi Alissia, as l'ont volu foère un tchot mollé d'pusse in f'sant des visites in picard aveuc des liries, pi des diries.
Titine él Routchine pi mi, ch'Baveu d'Boves os avons prins un grand plaisi à foère cho... pi chés gins coére pusse éd plaisi à nous acouter... (moés d'juilet pi moés d'eût 2007)
d'abord, d'z'histoéres éd Ouins-Ouins, d'Pieds porris pi d'Brûleus d'Bousos...
pi après cho...
El garnoule qu'al veut ête aussi grosse qu'ech boeu
Ene garnoule apérchut un boeu
Qu'i san’noét gros conme un camion .
Elle qu'al étoét conme un pipion…
Invieuse, al dit à s'soeur :
Tu vos m'édier, tu vux?
Cope don un fétu d'pale, et pi foés n’né ène pipette,
Pi souffe éd you qu'tu sais pour èm’ foère ène gonflette.
R'bé mé bien ...J'ai grochi ? J'sus-ti déjo conme li?
Point coère... mais t'os pardu tes plis .
J'y sus ti éch coeup-chi ?
Non, tu n'n'est coère dé loin !
A feurche qué j’té trahale,
Et'pieu al est tout ronde, tu prinds l'alleure d'ène balle .
Cha y est, j'y sus !
Ah! bien non qu'tu n'y es point!
J'y arriv'rai, ch'est seur...contineue éd soffler...
Ed continuer j'vux bien,
Mais n'feudroét qua même point
qu'y euche un r'tour ed vint.
Al l'o gonflé si feurt qu'al l'o foét aclater.
Riche et pi bien portant, o frez tout l'temps d'z'invieux...
Qui pour monter pus heut vont bien ristcher leu pieu. (Tchot Jacques VARLET)
Si nou Sonme all’avoèt volu min tchot fiu
Quand tout tchote a s’o mis in route,
Descheinde tout droét sins qu’cho li coûte
Et n’point s’décatorner sin c’min,
Cho éroèt foèt un rude cang’mint
All’éroét r’chu l’Seine au liu d’l’Ave
Si nou Sonme all’avoèt volu min tchot fiu
Ch’est elle qu’éroèt foèt ch’port du Have ! (Maurice GARET)
Ouiiinn... ooouuuiiinnn... ooooouuuinnnn !
o marche miux dins l'réserve aveuc éch pipasso à ch'Flipe...
o s'croèroèt à ch'Pont d'la rivière Kwaï...
Ech l’héron
Ene foés, su ses longués tchiles... j'sais point cho qu'i f’soét lo,
Un héron à long bec immantché d'un long co,
I s'preumnoét su ch'l’éc'min du halache .
L' Somme a l'étoé fène claire, ch'étoét d'vant chés balaches,
O voéyoét chés pichons comme si qu'o z'étoét n'dins.
Ech'l'héron l'éroét pu n'in foère un grand festin.
Mais ch'n'étoét point tout à foét l'heure qu'i maque !
I v'noètent jusqu'à chés bords, ch'ti lo n'avoét qu'à prinde .
Mais il o cru miux foère d'attinde
Qu' cha tire pu fort su s' n'estomaque...
Ch'étoét un routineu, un nactieu,
Un m'os-tu-vu, un imbléyeu !... (Tchot Jacques VARLET)
Biév'nue à ch'flot aveuc chés rosieux à bites éd singes !...
à ch'mirador, o voét toute dé l'réserve...
un boin indroét pou racontier l'léginde éd Sante Ulphe pi Sant Domice...
Mais soin dé n'point d'trop rigoler aveuc l'érligion sins cho, ch'temps i s'gadroulle...
ULPHE PI DOMICE Dins chés temps r’tchulés (...pinsez, os sonmes au VIIIinme sièque...) éne bielle jon’ne file vivoèt avu sin père, s’mère, ses frères pis ses sœurs… Oh ! Oh ! mais ch’n’étoèt point l’bonheur !
Chés rachin’nes a corr’nt toute oute chés rosieux pi as s’infonch’nt dins l’ieu croupie d’chés treus qui suint’nt dins chés marécaches. Ech’ solé i traverche diffichil’mint chés branques.
O s’croèroèt à ch’poèyis d’chés chorchelles pi o s‘attind à vir seurtir éd chés buchons des monstrés poéillus qui raqu‘nt du fu pér leus bouques pis leus treus d’nez... (ch'Mariel)
pi ch'est d'z'histoéres éd grands abes..
pi éne eute histoére à ch'Mariel pou savoér écmint qu'l'Ave pi l'Noéye as l'ont foèt pou s'rincontrer à Boves...
pi coére éne histoére éd bréilloére pi d'puche tornant d'où qu'des gins is disparaich'nt dins ch'torbillon aveuc leus gvaux pi leu cariole...
mais un tchot mollé pus loin... Sante Ulphe a n'o vraimint point digéré s'n histoére érvue pa ch'Mariel... i s'met à tchér des tchiens pi des cots..
alorse os prindrons tértous nous gambes à nous cos pi o nous méttrons au rado dins ch'chalet... d'où qu'un boin coeup d'chite i nous attind aveuc dé l'brioche... pou s'érmonter l'moral os z'irons dé l'canchon'nette aveuc "chés boins fius"
Ch’est des boins fius, ch’est des boins fius, Ch’est des boins fius, mais quand qu’is boèt’nt, Ch’est des boins fius, ch’est des boins fius, Mais quand qu’is boèt’nt, is sont seus pi is n’sait’nt té pus.