Portes ouvertes Hortipassion
Ene novelle page a s'ove... pou vous parler dé ch'l'évèn'mint qui l'o étnu chés Tchots Lapans blancs d'Vignacourt in halein.ne dins ch'viquéne... él PORTES OUVERTES à l'FERME HORTIPASSION...
Dins chés jors qui vont seuire, os purrez vous preum'ner dins l'Ferme Rouvillain vou tchul su vous cayelle...
D'abord dins chés serres... pi dins zz'histoires dé ch'Baveu d'Boves pi Titine él Routchine... pi os rincont'rez un marichau-ferrant, Jean-michel pi ses tchotes vitrines, éne hortilon.ne, éne peintureuse, éne potière, éne cadreuse in relief, un torneu su bos médiévau... os découvrirez chés confiteures à l'fleur pi dins un eute érgiste, un platcheu d'torchis...
Efsons d'abord con.noèchinche aveuc l'Ferme Hortipassion...
Hortipassion, ch'est des serres grandes conme des mitans d'terran d'fotbale... pi rindez-vous compte, i gn'in o troés fil l'éne d'l'eute sins compter chés plans d'vivaches à coeté...
A pein.ne rintrés, os êtes prins pa l'caleur qua vou cange dé ch'frèque dé l'sison... o dit tours ; "in avri, warde ét lain.ne dsu tin nombri !"
L'porte passiée, ch'est éne ésplogion d'coleurs !
Chés géranionmes, ch'est chés roés dé l'jornée mais eussi d'tous chés jors dé ch'boin temps... os zès ratreuv'rez à chés croésées...
Soin à vous, in vous preumnant dins chés travées, os ristchez d'apérchuvoér ch'wardien dé ch'catieu...
Pline, ch'est sin nom... point Pline ch'l'Inchien... nan, Pline éch fauve... o n'diroèt ti point un ion plein mitan dé l'savane ?...
A Hortipassion, chés gins is sont man dans l'man pou chés Portes Ouvertes... ch'parson.nel i sait foère toute : bêcher, ésmer, rimpoter... pi eussi conséller pi vinde... i sait minme attinde éch client intér deux histoéres à ch'Baveu d'Boves...
Ichi Florence él grande soeur... Francine, él manman dé l'fanmile Rouvillain... pi ch'François aveuc és'file, des coepans d'lonque date...
Mais l'Rein.ne dé l'Ferme Hortipassion, ch'est elle nou bielle gardinière... muchée in nsous sin bieu capieu d'feurre... Carole qua vous s'ro tours éd boin consél pou vous fleurs.
Dins l'preuchain.ne page, os sérez toute dé zz'histoéres à ch'Mariel pi d'sin Blanc bon.net...